2Ki 2 | NdeIBE | STEP | Kwathi uJehova esezathatha u-Elija ukuba aye ezulwini ngesivunguzane, u-Elija lo-Elisha babevela eGiligali.

2 Kings 2

U-Elija Uhwithelwa Ezulwini

1 Kwathi uJehova esezathatha u-Elija ukuba aye ezulwini ngesivunguzane, u-Elija lo-Elisha babevela eGiligali.

2 U-Elija wathi ku-Elisha, “Hlala lapha; uJehova usengithume eBhetheli.” Kodwa u-Elisha wathi, “Njengoba uJehova ephila njalo njengoba lawe uphila, angiyikutshiyana lawe.” Ngakho basuka baya eBhetheli.

3 Iqula labaphrofethi eBhetheli leza ku-Elisha lambuza lisithi: “Uyakwazi yini ukuthi uJehova uzakuthathela inkosi yakho lamuhla na?” U-Elisha wathi, “Yebo, ngiyakwazi, kodwa lingakhulumi ngakho.”

4 Ngakho u-Elija wasesithi kuye, “Hlala lapha, Elisha; uJehova usengithume eJerikho.” UElisha waphendula wathi: “Njengoba uJehova ephila njalo njengoba lawe uphila, angiyikutshiyana lawe.” Ngakho basuka baya eJerikho.

5 Iqula labaphrofethi eJerikho laya ku-Elisha lambuza lisithi, “Uyakwazi yini ukuthi uJehova uzathatha inkosi yakho lamuhla na?” Waphendula wathi, “Yebo, ngiyakwazi, kodwa lingakhulumi ngakho.”

6 Ngakho u-Elija wasesithi, “Hlala khonapha; uJehova usengithume eJodani.” Yena waphendula wathi, “Njengoba uJehova ephila njalo njengoba lawe uphila, angiyikutshiyana lawe.” Ngakho baqhubekela phambili ngohambo.

7 Amadoda angamatshumi amahlanu exukwini labaphrofethi asuka ayakuma bucwadlana ekhangele lapho u-Elija lo-Elisha ababemi khona eJodani.

8 U-Elija wasethatha ingubo yakhe, wayigoqa watshaya ngayo amanzi. Amanzi adabuka phakathi amanye aba kwesokunene amanye kwesokhohlo, basebechapha emhlabathini owomileyo.

9 Ekuchapheni kwabo, u-Elija wathi ku-Elisha, “Akungitshele, kambe kuyini engingakwenzela khona ngingakasuswa kuwe?” U-Elisha waphendula wathi, “Ngicela isabelo esiphindwe kabili somoya wakho.”

10 U-Elija wathi, “Usucele into elukhuni, kodwa ungangibona ngisuswa kuwe kuzakuba ngokwakho, kungenjalo hatshi.”

11 Besahamba belokhu bekhuluma, kwafika inqola yokulwa yomlilo lamabhiza ayo avuthayo yabehlukanisa, ngakho u-Elija waya ezulwini ngesivunguzane. 12 U-Elisha ebona lokhu wamemeza wathi, “Baba! Baba! Izinqola zokulwa labamabhiza okulwa ako-Israyeli!” UElisha kasazange aphinde ambone futhi. Wasethatha izigqoko zakhe wazidabula.

13 Wasedobha ingubo eyayiwe ku-Elija wabuyela emuva wayakuma okhunjini lomfula uJodani. 14 Wathatha ingubo eyayiwe kuye watshaya ngayo amanzi wathi, “Ungaphi khathesi uJehova, uNkulunkulu ka-Elija?” Wasetshaya amanzi, adabuka phakathi amanye kwesokunene amanye kwesokhohlo, wasechaphela ngaphetsheya.

15 Ixuku labaphrofethi ababevela eJerikho, ababebukele, lathi, “Umoya ka-Elija uphezu kuka-Elisha.” Basebesiya mhlangabeza bakhothama phambi kwakhe. 16 Basebesithi, “Uyabona, thina izinceku zakho silamadoda angamatshumi amahlanu enelisayo. Yekela amadoda la ayedinga inkosi yakho. Mhlawumbe uMoya kaJehova umthethe wayambeka entabeni ethile loba esihotsheni esithile.” U-Elisha wathi, “Hatshi, lingabathumi.”

17 Kodwa baphikelela waze wakhulelwa zinhloni zokuba elokhu esala. Wasesithi, “Bathumeni.” Ngakho bathuma amadoda angamatshumi amahlanu, amdinga okwezinsuku ezintathu amswela. 18 Bathe sebebuyela ku-Elisha, owayesehlala eJerikho, wababuza wathi, “Bengingalitshelanga yini ukuthi lingamdingi?”

Ukuhlanjululwa Kwamanzi

19 Amadoda omuzi wakhona athi ku-Elisha, “Akubone, nkosi yethu, umuzi lo usendaweni ebukekayo, njengoba lawe uzibonela, kodwa amanzi alapha mabi lomhlaba wakhona awulazithelo.”

20 U-Elisha wathi, “Ngiphani umganu oyingubhe liwufake itshwayi.” Ngakho bawuletha umganu.

21 Wasephuma esiya emthonjeni wafika waphosela khona itshwayi ekhuluma esithi, “Ilizwi likaJehova lithi: ‘Sengiwahlambulule amanzi la. Awangeke aphinde futhi abangele imfa loba ukungatheli kuhle kwalumhlaba.’ ”

22 Amanzi lawo kusukela mhlalokho kuze kube lamuhla mahle, njengokwakutshiwo ngu-Elisha.

Ukuhozwa Kuka-Elisha

23 Esuka lapho u-Elisha waya eBhetheli. Esahamba endleleni, kwavela kulowomuzi ixuku lentanga yabatsha lamhoza lisithi, “Qhubeka, wena mpabanga! Qhubeka, wena mpabanga!” 24 Wanyemukula, wabakhangela wasebehlisela isiqalekiso ngebizo likaJehova. Kwasekuvela amabhere amabili ehlathini afohloza abangamatshumi amane lababili babo.

25 Wasesedlulela eNtabeni yaseKhameli, uthe esesuka lapho waya eSamariya.